សេចក្ដីថ្លែងការណ៍ស្ដីពី​វិសោធនកម្ម​ច្បាប់បោះឆ្នោត ២៣ ០៦ ២០២៣

សេចក្តីថ្លែងការណ៍ ស្តីពី វិសោធនកម្មច្បាប់បោះឆ្នោត

គណបក្សប្រជាធិបតេយ្យមូលដ្ឋាន ខកចិត្តជាខ្លាំងដែលសង្កេតឃើញវិសោធនកម្មច្បាប់បោះឆ្នោតត្រូវបានអនុម័តដោយរដ្ឋសភាគ្រប់គ្រងដោយគណបក្សប្រជាជនកម្ពុជា យ៉ាងតក់ក្រហល់ កៀកទៅនឹងថ្ងៃបោះឆ្នោតបែបនេះ។

គបម យល់ឃើញថាគោលបំណងរបស់ច្បាប់ស្ដីពីវិសោធនកម្មច្បាប់បោះឆ្នោតនេះ មិនស៊ីសង្វាក់ជាមួយនឹងខ្លឹមសារនោះទេ ពីព្រោះវាមិនបានលើកស្ទួយគុណតម្លៃនៃគោលការណ៍ប្រជាធិបតេយ្យសេរីពហុបក្សដូចបានលើកឡើងក្នុងសំណើវិសោធនកម្មនោះឡើយ ផ្ទុយទៅវិញ វាធ្វើឲ្យដំណើរការប្រជាធិបតេយ្យសេរីពហុបក្សកាន់តែរួមតូចចង្អៀតទៅវិញ ហើយបង្កឲ្យមានភាពភ័យខ្លាច ភាន់ច្រឡំ និងប៉ះពាល់ដល់ការសម្រេចចិត្តរបស់ម្ចាស់ឆ្នោតថែមទៀត។ 

គបម យល់ឃើញថាច្បាប់នេះ គឺនៅមានមន្ទិល និងភាពមិនប្រក្រតី ជាច្រើនទាក់ទងទៅនឹងនីតិវិធីនៃការកំណត់   លក្ខណៈវិនិច្ឆ័យហេតុផល និងការគ្រប់គ្រងទិន្នន័យឈ្មោះអ្នកដែលខកខានមិនបានទៅបោះឆ្នោត។ ការហាមឃាត់មិនឲ្យឈរឈ្មោះឲ្យគេបោះឆ្នោតរហូតដល់ទៅរយៈពេល ១០ឆ្នាំ ដោយសារការខកខានមិនបានទៅបោះឆ្នោត ជាលក្ខខណ្ឌមិនសមហេតុផលនោះទេ។

គបម យល់ឃើញថា ការធ្វើវិសោធនកម្មច្បាប់នេះ គឺជាការប្រើប្រាស់អំណាចនីតិបញ្ញត្តិជាឧបករណ៍ដើម្បីយុទ្ធសាស្ត្រកេងចំណេញនយោបាយរបស់គណបក្សកាន់អំណាចដើម្បីបង្រ្កាប បំបាក់ រឹតត្បិតកម្លាំងគណបក្សដែលជាគូរប្រកួត។

គបម សូមអំពាវនាវម្ចាស់ឆ្នោតទាំងអស់ដែលជាអ្នកកំណត់វាសនាខ្លួន និងប្រទេសជាតិខ្លួន សូមតាមដានឲ្យបានដិតដល់នូវសកម្មភាពរបស់អ្នកតំណាងរាស្ត្រ អ្នកអនុម័តច្បាប់ ហើយសម្រេចចិត្តដោយពិចារណាឲ្យបានច្បាស់លាស់ ក្នុងការជ្រើសរើសអ្នកតំណាងរបស់ខ្លួនដែលតម្កល់ប្រយោជន៍ប្រជាពលរដ្ឋ ប្រយោជន៍ជាតិជាធំ ធានាការពារសិទ្ធិ ជាពិសេសសិទ្ធិនយោបាយ និងប្រយោជន៏ប្រជាពលរដ្ឋពិតប្រាកដ ក្នុងការបោះឆ្នោតខាងមុខ។

សូមពិចារណាឡើងវិញថា ការគូសបំផ្លាញសន្លឹកឆ្នោតមិនមែនជាដំណោះស្រាយនោះទេ ប៉ុន្តែគប្បីប្រើសន្លឹកឆ្នោតរបស់ខ្លួន បញ្ចេញសម្លេងខ្លួនដើម្បីបង្កើតឲ្យមានតុល្យភាពអំណាចកុំឲ្យសភាមានសំឡេងតែឯកបក្សទៀត គឺត្រូវមាន ពហុសំឡេង ដើម្បីឲ្យមានគណបក្សនិងតំណាងរាស្រ្តដែលធានាការពារសិទ្ធិនិងប្រយោជន៍របស់ប្រជាពលរដ្ឋពិតប្រាកដ ឲ្យស្របទៅតាមគោលការណ៍ប្រជាធិបតេយ្យសេរីពហុបក្សដែលបានចរិកនៅក្នុងរដ្ឋធម្មនុញ្ញនៃព្រះរាជា​ណាចក្រកម្ពុជា។